USOLWAZI Nokuthula Winfred Kunene uzoqala ekuqaleni konyaka ozayo (2026), ukuphatha i-University of Zululand (oNgoye).

Menzi Jele

IQOPHE umlando i-University of Zululand (Unizulu), njengoba iphinde yaqoka owesifazane ukuba abe ngumpathi wayo, osekungokwesine belandelana.

USolwazi Nokuthula Winfred Kunene, uzoqala ukwengamela le nyuvesi, enekomkhulu KwaDlangezwa, eMpangeni, mhla ka-1 kuMsingana (January) ku-2026.

USolwazi Kunene akamusha e-Unizulu njengoba njengamanje engamele uPhiko loCwaningo (Research and Innovation) kusona lesi sikhungo, kusukela ngo-2021.

Ugogode emkhakheni wezolimo (Agricultural Science), njengoba eneziqu zobudokotela kuwona. Ungumcwaningi ohlonishwayo, ngoba bambalwa abesifazane abasemkhakheni wezolimo.

Selokhu afika oNgoye (okungelinye igama le nyuvesi edume ngalo), usekhombise ukudlondlobala, njengoba eke waba nguMphathi emkhakheni weSayensi, ezoLimo nobuChwepheshe, kusona lesi sikhungo, kusukela ngo-2016 kuya ku-2021.

Phakathi kwezinto azicwaningile, yizindlela zokufuya izimvu zesiNguni, nezinkukhu zesiZulu. Phakathi kwamanyuvesi afunde, kuwo kubalwa i-University of Swaziland, i-University of Peregia, i-University of KwaZulu-Natal, ne-University of Stellenbosch.

UNgoye sekungokwesine luphathwa yimbokodo ilandelana, yonke engosolwazi emikhakheni eyehlukene.

Luke lwaphathwa nguSolwazi Rachel Gumbi, kwalandela uSolwazi Fikile Mazibuko, kweza uSolwazi Xoliswa Mtose, njengoba sekuphatha uSolwazi Kunene.