Kuphelile ngoKwenzo Ngcobo kwiScandal

Lo mlingisi ubedlala indawo kaNhloso obexakwe wuthando lwabesifazane ababili...

 Kakucaci ukuthi uKwenzo uzolibangisa kuphi emuva kwalo mdlalo...

Lucky Cain

KUPHELILE ngendawo kaNhloso edlalwa nguKwenzo Ngcobo, emdlalweni owuchungechunge okhonjiswa phakathi nezinsuku iScandal, esiteshini sikamabonakude esizimele
i-etv.

UKwenzo ungomunye wabalingisi abafike kulo mdlalo bawushubisa eminyakeni eyedlule. Indawo abeyilingisa kaNhloso, ibikhungethwe yizinkinga ezahlukene. Kulo mdlalo uNhloso uzithole eba nokudideka othandweni, waba nesithembu agcine ezisola ngaso njengoba sigcine simphathisa ngekhanda.

 NguKwenzo Ngcobo olingisa indawo kaNhloso kwiScandal.

UKwenzo odabuka eMthwalume, uqale ukuzakhela igama emidlalweni yeshashalazi ngaphambi kokuba abonakale emdlalweni owaba nedumela iThe Wife.

 NguKwenzo Ngcobo noGaisang Noge ngesikhathi belingisa kwiThe Wife.

Kulo mdlalo uzakhele udumo njengoba ephinde waklonyeliswa nangezindondo zokuba ngumlingisi ovelele. Kulindeleke ukuba agcine ukubonakala namhlanje ngoLwesihlanu kwiScandal.

Imizamo yokuthola lo mlingisi iphunzile, ucingo lwakhe belukhala lungabanjwa. Akucaci ukuthi usezobonakala kumuphi umdlalo njengoba eshiya iScandal asechithe  iminyaka engaphezulu kwemibili kusona.

Okhulumela i-etv, uTshegofatse Kolotse, ukuqinisekisile ukushiya kukaKwenzo kulo mdlalo, nokuphela kwendawo kaNhloso kuwona. Uthe njengoba lo mdlalo uvalelisa uKwenzo, ababukeli bazosala nemibuzo engaphendulekile.

IScandal sibalwa neminye imidlalo ehamba phambili ngababukeli kulesi siteshi esizimele, njengoba ugabe ngabalingisi abanohlonze futhi asebemnkantshubomvu kulo mkhakha.
lucky.cain@ilanganews.co.za