I-TROMPIES ine-EP entsha, esebenze kuyo namaciko asemasha.

I-Trompies kayizimisele ngokuthatha umhlalaphansi

Thandi Zondi

IQEMBU lomculo iTrompies, elizakhele ugazi ngezingoma ze-kwaito okubalwa kuzo iSigiya Ngengoma, iSweety Lavo, iMadibuseng, iBengimngaka nezinye, lithi kalizimisele ngokuthatha umhlalaphansi.

Leli qembu linamalungu okunguJairus "Jakarumba" Nkwe, uZynne "Mahoota" Sibika, uMandla "Spikiri" Mofokeng, no-Eugene Mthethwa. U-Emmanuel "Mjokes" Matsane ushone ngo-2021.

UJakarumba oxoxe naleli phephandaba, echaza ngokunyamalala kwabo, uthi: "Besinganyamalele, besikhona simatasa, sibhukhwa njalo ngezimpelasonto.

"Kawukho umculo ebesiwukhipha, besithathe ikhefu ngemuva kokushona kukaMjokes.

"Kunezingoma ebezinaye, ngakho-ke, bekumele sikhulume nomndeni kuqala ukuthi sithole amalungelo okuzisebenzisa, nomndeni nawo uphethe zonke izingxoxo ezithinta okumayelana naye," esho.

I-Trompies iqeda iminyaka engaphezulu kuka-30 isendimeni yomculo.

Ikhiphe ne-EP entsha ethi, Pantsula For Life, abasebenze kuyona namaciko asemasha, okubalwa kuwo uNokwazi, uKwesta, uStoan, uKabza De Small, uToss namanye.

"Kube yi-project emnandi kakhulu, futhi esiyijabulele nathi. Kudala amaciko elokhu esicela ukuba siwasondeze uma kunomsebenzi omusha esiwenzayo.

"Ukuhlangana sonke njengezizukulwane ezahlukene, kusinike ithuba lokufunda kubona, nabo bafunde kithina njengabantu abakhule bebukela kithina.

"Kuhlezi kuyintokozo ukucobelelana ngolwazi nesizukulwane esincane, esiza ngemuva kwethu," kuchaza uJakarumba.

Uthi nakuba kuke kwanezinkulumo eziningi ngokufa komculo we-kwaito, kepha uthi lolu hlobo lomculo kaluyi ndawo.

"Ikwaito yiyona eyavulela indlela amapiyano, i-hip hop yaseMzansi neDurban kwaito, kuphela nje banonga bafake okwehlukile lapha nalaphaya. Kuze kube manje angikaze ngiyibone i-obituary ye-kwaito.

"Lokho kusho kuthi ayikafi, sisaqhubeka nokuyigcina iphila," esho.

UJakarumba echaza ngokubagcine yonke le minyaka kulo mkhakha womculo, uthi: "Ukuzwana kwethu kwahlanganiswa emazulwini. Siqale singabangani, sagcina sesenza umculo ndawonye.

"Ukuhloniphana sisodwa kubalulekile nakho, akukho lapho kungaxatshanwa khona, kodwa okubalulekile wukubonisana nokubuyisana. Yonke into sabelane ngayo ngokulingana. Nokuhlonipha umsebenzi wethu ngoba uyisinkwa sethu," esho.

Uthi ngasemaphethelweni akulo nyaka, bazokhipha i-album enamanye amaciko asemasha, okubalwa kuwona noSjava oke wenza kabusha ingoma yeTrompies ethi Madibuseng, kwi-album yakhe ethi, Inkanyezi.

Kwabeza ngemuva, leli qembu libayala ngokuthi bangayeki ukubhala, ukwenza kabusha izingoma nokufunda okusha okufikayo kulo mkhakha.

"Uma uyiciko, kumele ube nomqondo ovulekile, ungafaki amahhanisi ukuze ukwazi ukuhamba nokushintsha kwezikhathi," kuphetha uJakarumba.