NGU-ELANA Afrika, ongomunye wabazobe besitshengisa okwenzeka emcimbini wamaSafta, ngoMgqibelo. 

Sekumi ngomumo ngokuklonyeliswa
kwabakwi-TV nakumafilimu

Lucky Cain

KONKE sekumi ngomumo ngomcimbi wokuklomelisa abasemkhakheni wezikamabonakude namafilimu eNingizimu Afrika, iSouth African Film and Television Awards (SAFTA), ozoba ngoMgqibelo, ozokhonjiswa kwi-SABC 2 kusihlwa.
 
Lo mcimbi wokuklomelisa uzobe usuwenzeka okuka-19 kulo nyaka.  Kulindeleke ukuba ube sezingeni eliphezulu, kwazise uzobe wethulwa ngosaziwayo asebezakhele igama kulo mkhakha.

Phakathi kwalabo abazobe bephethe uhlelo, kubalwa u-Anele Mgudlwa (Mdoda) no-Alphi Mkhwanazi (osesithombeni esingezansi), abazobonakala esiteji esikhulu sangoMgqibelo.

U-Elana Afrika noMoshe Ndiki (osesithombeni esingezansi), bazobonakala bephethe uhlelo kulabo abasebenza ngemuva kulo mkhakha.

UKat Sinivasan yena uzobonakala epheka osaziwayo ngemibuzo ngengqephu yabo kukhaphethi obomvu. 

Isikhulu sakwaNational Film and Video Foundation (NFVF), ehlela lo mcimbi, uNkz Onke Dumeko, sichaza ngalolu hlu losaziwayo abaqokiwe ukusingatha lo mcimbi walo nyaka, sithe babakhethe ngoba bebefuna abazokwazi ukuqonda ngokugcwele lo mkhakha, futhi abazokhuthaza izethameli, kanjalo nokubungaza ithalente laseNingizimu Afrika.

Uthe labo saziwayo baqhamuka ngezindlela ezahlukene kulo mkhakha, futhi kuningi asebekuzuzile kuwona, njengoba bemele zonke izinhlangothi ezikhona kuwona," kusho uNkz Dumeko.

U-ANELE Mgudlwa (Mdoda) ungomunye wabazobe bephethe uhlelo kumaSafta.

Lo mcimbi uzoqala namhlanje ngoLwesihlanu, lapho kuzobe kuklonyeliswa labo abasebenza ngemuva kulo mkhakha.  Uzobe ukhonjiswa bukhoma kwi-YouTube, kusukela ngehora lesikhombisa kusihlwa.

NgoMgqibelo kuzobe sekuba wumcimbi omkhulu, ozokhonjiswa kwi-SABC 2, kusukela ngo-19:30 kusihlwa. Kulo mcimbo kuzobe sekuklonyeliswa abalingisi nale midlalo edlisela ogageni.

Iminxa yeBest TV Presenter noweMost Popular Soap/ Telenovela, yiyona ebhekwe ngabomvu, kwazise yiyona ebivotelwa wumphakathi njengoba ukuvota kuvalwe ngoLwesithathu kusihlwa.