OweGagasi FM uqhakambisa ukubambisana ngempumelelo

 Lucky Cain 

ISIKHULU seGagasi FM uNkk Minenhle Dlamini, siqhakambisa ukubambisana kwezisebenzi nezinhlaka ezisebenzisana nalo msakazo, ngempumelelo abayizuze kulo nyaka.

Ngokusho kukaNkk Dlamini, lo msakazo ukwazile ukukhula ngokwabalaleli kuzona zonke izinkundla otholakala kuzona, ikakhulukazi kwi-App yawo.

NgoLwesibili lo msakazo ubuhalalisela izisebenzi zawo nabasakazi abenze kahle kulo nyaka, baphinde baphumelela kweminye imisebenzi abebeyenza engahlangene nalo msakazo.

Phakathi kwabasakazi abahalaliselwe kubalwa u-Alex Mthiyane ogubha iminyaka ewu-30 esemkhakheni wabezindaba nokusakaza, uFelix Hlophe ngohlelo lwakhe lukamabonakude iLife with Felix Hlophe kuMzansi Magic, uSphokuhle Luthuli ongumlingisi emidlalweni nakumafilimu oqokwe emcimbini weSimon Mabhunu Sabela Awards, u-Ayanda Nyuswa owethula ezemidlalo osohlelweni lomncintiswano lokuthungatha umethuli wezemidlalo, kwaSuperSport, nabanye.

Ngu-Alex Mthiyane ohalaliselwe ngokugubha iminyaka ewu-30 emkhakheni wezindaba.

Lo msakazo uphinde wahalalisela abasakazi uKhaya Mthethwa ngokubopha ifindo likasofa silahlane, noMinnie Ntuli ngokuthola umntwana nangokulotsholwa ngabakwaNdlovu.

 Kuhalaliselwe nomunye wabasakazi beGagasi FM, uKhaya Mthethwa ngokubopha ifindo noNkk Sine Mthethwa.

Impumelelo yalo msakazo iphinde yabonakala nangesikhathi ufakwa ohlwini lwamabhizinisi ahamba phambili KwaZulu-Natal, ngaphansi kweKZN Top Business Portfolio.

UNkk Dlamini ungomunye wabahlabanile ngempumelelo yakhe kulo nyaka, njengoba eqokwe ngokuba ngowesifazane ovelele emunxeni weMedia Executive of the Year, emcimbini weBroadcast Media Awards Southern Africa 2025.
 
Le ntokazi iphinde yagixabezwa ngesikhundla sokuba yiSecond Vice President weDurban Chamber of Commerce, kuwona lo nyaka.

Ekhuluma neLANGA Lempelasonto uNkk Dlamini, uqhakambise ukubambisana nezisebenzi zonke zeGagasi FM, njengoba ekubeke kwacaca ukuthi ngaphandle kwakho, ngabe lo msakazo kawubalwa nehamba phambili kuleli.

"Le mpumelelo kakuyona eyami kuphela kodwa ngeyokubambisana nokusebenzisana okuhle. Okunye uma sisebenza, sisuke singabhekile ukuhlomula kodwa siqinisekisa ukuthi sibeka umlaleli weGagasi phambili, futhi uzizwa naye eyingxenye yawo," esho.

Uthi abakubhekile manje wukuthi bavale unyaka ngegiya eliphezulu ngendumezulu yomcimbi wabo obhekwe ngabomvu obizwa ngeGagasi Beach Fest, ozoba ngomhla ka-6 kuDisemba ePeoples' Park, eMoses Mabhida Stadium, eThekwini.

Uthe iyamthokozisa indlela amathikithi alo mcimbi athengiswa ngayo, njengoba sekusele kancane ukuba adayiswe aphele.