Inkakha ikhuthaza abasakhula ngosizi lwayo

Lucky Cain

INKAKHA yomlingisi iphendule usizi lokwazi ngoyise isineminyaka ewu-58 ubudala, lwaba yindlela yokukhuthaza nokugqugquzela abantu abasha.

UJerry Mofokeng (70), ongumlingisi oseke wabonakala emidlalweni eyahlukene kumabonakude nakumafilimu, ubengesinye sezikhulumi emcimbini obizwa nge-Boyz2Men Seminar 2026, wokudodisa abafana abancane babe ngamadoda aqotho.

Uthe yizona lezo zingqinamba ezenze bathatha iminyaka eyishumi ukubuyela eThekwini, njengoba lo mzungezo wagcina ngo-2015 kuleli dolobha abalithatha njengekhaya labo.

Kulo mcimbi obuseChristian Worship Centre, eMngeni, eThekwini, bekunezikhulumi ezahlukene okubalwa kubona uMnu Thami Zondi osebenza eMnyangweni wezoku- Thuthukiswa koMnotho, uLinda Sibiya, uDkt Khayelihle Nzimande, usomabhizinisi uMnu Mlu Wosiyane noMofokeng, ukudodisa abafana abebeqhamuka emalokishini ahlukene ngaphansi kukaMasipala weTheku, okubalwa kuwona iKwaMashu, uMlazi, iClermont neLamontville.

Izikhulumi kulo mcimbi zicathulise abafana abebengaphezulu kuka-300, ngokuziphatha nangokuqhamuka namasu okuziqalela amabhizinisi nokunye okungabathuthukisa.

UMofokeng osezibiza ngoJerry Mofokeng waMakhetha, ukhuthaze abafana ngempilo nangebanga alihambile empilweni.

Ekhuluma neLANGA Lempelasonto, uthi ukukhula engamazi uyise bekumudla ngaphakathi, ikakhulukazi ngoba ebengekho obefuna ukumchazela ngemvelaphi yakhe.

Uthole ngemvelaphi yakhe eneminyaka ewu-58 ubudala

Uthi uze wathola ngemvelaphi yakhe ngo-2014, eseneminyaka ewu-58.

"Akubanga wuhambo olulula empilweni yami ngoba bengihlale nginentshisekelo yokwazi ukuthi ungubani ubaba wami. Ngeshwa ngithole ngaye engasekho emhlabeni," esho.

Uthe kunezinto ezilimaza abafana abancane, bafele ngaphakathi kugcine kubalimaza uma sebekhulile. Uthe naye udlulile kuleso sigaba, kodwa waba nenhlanhla ukuthi umkakhe ukwazile ukuba naye, wameseka, wamxhu- manisa nabefundisi abebemkhulekela.

"Yingakho ngize ngabhala nencwadi ngemuva kokupholisa inhliziyo yami, sengitholile ngobaba," echaza. 

Ukhuluma ngencwadi esihloko sithi, I'm A Man ayibhalile ukukhuthaza abanye.
Uthe uma engekho matasa, weluleka abasakhula ngoba ukubona kumqoka ukuthi ingane yomfana ingasali ngaphandle uma kunezinhlelo zokukhuliswa kwezingane.

NGUJERRY Mofokeng othi abafana kuyabalimaza ukungabi nobudlelwano noyise, kodwa bafela ngaphakathi.

UMofokeng uthe umatasa nomdlalo iMabaso Family Reunion, ozokhuza ibuya kumabonakude. 

Usezinhlelweni zokuqopha isiqophamlando ngowesifazane osedlwengulwe izikhawu empilweni yakhe, njengoba aqala engaphansi kweminyaka eyishumi ubudala. 

Uthe lona wesifazane usebhale incwadi abazimisele ukuyenza isiqophamlando ngokuhamba kwesikhathi, ibe yifilimu ezoqwashisa, ikhuthaze abanye besifazane.

UMofokeng useke wabonakala emidlalweni nasemafilimini okubalwa kuwona iThe Line, iTsotsie, iCry The Beloved Country, iMama Jack, iSafe House namanye.

Useke wahlabana ngezindondo okubalwa kuzona eyeLifetime Achievement koweSAFTA nakwi-Royalty Soapie Award, wahlabana nangeyeThe African Film Legend Award.