Izindaba | 06
Friday, 09 May 2025
Bazovikela ukuwa kweMithente
Uzongena ezicathulweni zikanina
NGULUNGILE Mthalane ozalwa nguDumisile "KaManana" Mthalane (ongasekho), obecula phambili eqenjini likamaskandi iMithente.
ISITHOMBE NGU: JOHN HLONGWA
Indodakazi ithi leli qembu yilona ebeliphilisa umndeni, unina esaphila
Mthobisi Sithole
ITHEMBISE ukungena ezicathulweni zikanina indodakazi yomculi kamaskandi obefihlwa ngempelasonto.
ULungile Mthalane ozalwa nguDumisile "KaManana" Mthalane weqembu leMithente, uthi uzoqhubeka nokuhola leli qembu ngenxa yokuthi unina ubafundisile umculo. Uveze lokhu emuva kwenkonzo yomngcwabo kanina ebiseMakhabe-leni esigodini KwaDinda, eGreytown, ngempelasonto.
Uthi nakuba kunzima ngenxa yokuthi iziphiwo kazifani, kodwa uzokwenza ngakho konke okusemandleni ukuthi avikele leli qembu lingawi, ngenxa yokuthi yilona eliphilisa umndeni wakwaMthalane.
"Sikhuliswe ngomculo kusukela sibancane, ukushona kukamama kakufanele kusiqede amandla ngoba baningi abantu abayithandayo iMithente. Kuwumsebenzi wethu ukuthi sivuke sizithathe," kusho uLungile.
Unxuse abathandi bakamaskandi ukuba baqhubeke nokuleseka leli qembu. Uthi kumele izwe lamukele ukuthi zinkulu izicathulo azongena kuzona.
"Siyafisa nokugxekwa ngendlela eyakhayo uma singenzi kahle," esho.
NGUDUMISILE "KaManana" Mthalane (ongasekho), obecula phambili eqenjini likamaskandi iMithente.
ULungile uthe izwe malikwemukele ukuthi zinkulu kakhulu izicathulo azongena kuzona
Umsakazi woKhozi FM, uKhathide "Tshatha" Ngobe, ukhuthaze izingane zakwaMthalane ukuba zingapheli amandla. Uthe akusekho nzima emculweni ngoba sekuqoshwa ingoma eyodwa ithengiswe online.
"Kayisekho ingcindezi yokubhala izingoma ezingaphezulu kweshumi. Ngaleyo ndlela ngibona ukuthi akukho okuzogqilaza. Uma kukhishwe ingoma eyodwa, emnandi, bese idayiswa online, kuyobe kufeziwe," kusho uTshatha.
Uthe akanalo uvalo ngenxa yokuthi abasunguli baleli qembu uSimosakhe Mthalane noDumisile Mthalane, bazale izingane ezingamagagu, futhi bazikhulisa ngomculo izingane zabo.
"Ubugagu yinto yakwaMthalane. Siyafisa ukuthi iMithente iqhubeke ibe yiqembu elikhulu labesifazane eNingizimu Afrika," esho.
Leli qembu lisungulwe ngo-1986, kodwa i-albhamu yokuqala liphumelele ukuyikhipha ngo-1995, ethi "Umbulali.
Ekusungulweni kwayo iMithente, bekukhona uBuselaphi Gxowa noNokwazi Ntuli (ongasekho) namalungu akwaMthalane okunguDumisile nomyeni wakhe uSimosakhe (abangasekho).
mthobisis@ilanganews.co.za
YIQEMBU iMithente ebelihlomula nangezindondo.
Ilanga Lempelasonto