Uboshwe esekubhaceni owesifazane 'obhunyele owesilisa ngamanzi abilayo, kubangwa igwinya'

Kuthiwa lo wesifazane uphinde washaya isisulu ngenduku yomshanelo...

UKHALELWE ngamasongo kaSigonyela esekubaceni owesifazane waKwaNdengezi, osolwa ngokubhunyela owesilisa ngamanzi abilayo, kubangwa igwinya.

ILANGA Lempelasonto lithole ukuthi sibi isimo kuMnu Phumlani Mthombeni (40), wasePitoli, KwaNdengezi, okuthiwa ubhunyelwe ngamanzi abilayo abegcwele ibhakede, kulandela igxabano okuthiwa isuswe yigwinya.

NGUMNU Phumlani Mthombeni obhunyelwe ngamanzi abilayo kulandela ingxabano nowesifazane esuswe yigwinya.

Kubikwa ukuthi uMthombeni uphuthunyiswe esibhedlela elimele kanzima, kanti umsolwa ubalekile endaweni ngemuva kwalesi sigameko.

Ngokuthola kwaleli phephandaba, uMthombeni ubengumsizi walona wesifazane okuthiwa unesitolo esidayisa utshwala nokudla.

Kuthiwa indaba isuke ngemuva kokuba uMthombeni ekhale ngokuthi utshele umsolwa ukuthi umdayisele igwinya elidala eliqinile eseliphelelwe yisikhathi, nokube wukuqala kwengxabano phakathi kwabo.

Kuthiwa umsolwa udinwe yilokho wabilisa amanzi qede wabhunyela ngawo uMthombeni emzimbeni, ngaphambi kokumshaya ngenduku.

ILANGA Lempelasonto liyibonile i-video eqoshwe ngesikhathi kwenzeka lokhu, ekhombisa owesifazane eshaya ngomshanelo uMthombeni ephindelela.

UNkz Makhosi Cebekhulu, ongudadewabo kaMthombeni, uthe isimo sibi kumfowabo. Uthi umfowabo ulaliswe esibhedlela kusukela ngoMgqibelo, wadedelwa ngoMsombuluko.

"Umfowethu ubejwayele ukuhlala kulesi sitolo sakhe lo sisi, emsiza abuye amthume ukuyothenga ezinye izinto azidayisayo esitolo sakhe. 

 Uthi okubaphatha kabi wukuthi lona wesifazane uzame ukuyovulela umfowabo icala, ekubeni kunguyena ombhunyele ngamanzi.

"Ngemuva kokwenza le nto, ube esebaleka endaweni njengoba nomphakathi ubugxeka isenzo sakhe. Sizwe ukuthi amaphoyisa agcine emthola eMgungundlovu, lapho ebesecashe khona," kusho uNkz Cebekhulu.

Okhulumela amaphoyisa KwaZulu-Natal, uConst Thenjiswa Ngcobo usiqinisekisile isigameko, wathi amaphoyisa abophe umsolwa  wesifazane. Uthe kulindeleke ukuthi umsolwa avele enkantolo yemantshi ePinetown namahlanje ngoLwesihlanu. Uvulelwe icala lokushaya ngenhloso yokulimaza.