Uzokwethulwa eGateway oweShaka Ilembe 

NguNomzamo Mbatha ongumlingisi weShaka Ilembe, ozobonakala eGateway.

Lucky Cain

IZOKWETHULWA ngendlela eyahlukile kubantu isizini yesibili yomdlalo obhekwe ngabomvu iShaka Ilembe, okulindeleke ukuba uqale ukukhonjiswa esiteshini esingaphansi kweMultiChoice iMzansi Magic, Channel 161, ngomhla ka-15 kuJuni 2025.

Lo mdlalo ogabe ngabalingisi abaqavile kuleli, uzokwethulwa ngedili elizothatha izinsuku ezintathu eGateway Theatre of Shopping, eMhlanga kusukela ngomhla ka-16 kuya kumhla
ka-18 kuNhlaba 2025.

NguLemogang Tsipa noThembinkosi Mthembu abangabalingisi bomdlalo uShaka Ilembe.

Kuleli dili kuzobe kukhona osaziwayo abahlukene bezinhlelo ezingaphansi kweMultiChoice, okubalwa kubo uSweet Guluva wodumo lweBig Brother, uThembinkosi Mthembu, uNomzamo Mbatha nabanye abangabalingisi beShaka Ilembe.

Ngokusho kwesitatimende sakwaMultiChoice, leli dili lizoqala ngehora lesi-9 kulezi zinsuku zontathu kanti abantu bayanxuswa ukuba baphume ngobuningi njengoba kuzobe kunethuba lokuthi bashuthe, baphinde babuze nemibuzo kosaziwayo abazifela ngabo.

NguSweet Guluva osanda kuwina kwiBig Brother ozobonakala eGateway njengoba iMultiChoice izokwethula izinhlelo zayo .

Okunye, bazophinde bathole nethuba lokubuka ezinye zeziqephu zemidlalo eyahlukene, okubalwa nawo oweShaka Ilembe. Ngaphandle kwalokhu, bazothola ithuba lokuzitamuzela imititilizo yezipho ezizobe zikhona, eziqhamuka kubaxhasi balo mdlalo nokunye abazokuthokozela.

Sekuphele cishe iminyaka emibili kwaphela isizini yokuqala yalo mdlalo, kanti kuzokhumbuleka ukuthi yaba nedumela elikhulu, abantu bekhombisa ukuwuthakasela  nakuba walandelwa yizinkulumo, abanye bezwakalisa ukungenami ngokuphendukezelwa komlando wakwaZulu.

Abadidiyeli balo mdlalo okuyiBomb Productions, bathi lo mdlalo kawusiso isiqophamlando ngempilo kaShaka, kodwa ususelwa empilweni yakhe, okucacisa ngokusobala ukuthi kuningi okuzobe kungelona iqiniso kodwa kuhamba emigudwini yempilo yakhe.

Yingxenye yabalingisi abasha umdlalo uShaka Ilembe ezogadla ngabo kwisizini entsha.

Isizini yesibili yalo mdlalo igabe ngabalingisi abasha okubalwa kubo uZamani Mbatha, uLuyanda Zuma, uMelusi Mbele, u-Andile Mxakaza nabanye.