Lucky Cain

OWAYENGUKHOMISHANA wamaPhoyisa uMajor Gen Gomotso Phahlane (osesithombeni esingenhla), uveze ukuthi akukho angakwazi "ngobufakazi betulo lokumketula esikhundleni", obethulwe nguMnu Cedrick Nkabinde, ngesikhathi evele phambi kwekomidi lasePhalamende eliphenya ngokugxambukela kwesandla semfene emaphoyiseni nakwingalo yomthetho, i-Ad Hoc, ngoLwesithathu.

UNkabinde unconywe ngamalungu aleli komidi ngoLwesithathu esekhuza ibuya okwesibili phambi kwalo, njengoba bachitha ubufakazi bakhe ngoLwesine olwedlule, waze wavulelwa necala yi-EFF.

NgoLwesithathu udalule ubufakazi obushaqisayo ngamatulo abawahlela okuketula abathile ezikhundleni, nemihlangano ababeyibamba ukuqinisekisa ukuthi abathile abangeni ezikhundleni ezimqoka.

NGUMNU Cedrick Nkabinde.

Phakathi kwalabo okuthiwa baboshelwa amanqina enyathi yithimba likaNkabinde elihlanganisa uMnu Robert McBride, uMnu Paul O'Sullivan, amalungu eqembu i-AfriForum, intatheli nabanye, nguPhahlane owabe enguKhomishana wamaPhoyisa ezweni lonke.

UPhahlane wagcina ekhishiwe kulesi sikhundla ngokuhamba kwesikhathi.

ILANGA Lempelasonto lixhumane noPhahlane ngemuva kobufakazi obethulwe nguNkabinde ngetulo lokumketula esikhundleni. Uthe akamangali ngoba akukho okusha uNkabinde akushilo, angakwazi.

"Emhlanganweni wekomidi lamaphoyisa langomhla ka-16 kuMay 2017, ngakuveza lokhu njengoba kwaqubuka uphenyo esikhaleni ngami, elabe liholwa ngumuntu ongahlangene ne-IPID, u-O'Sullivan. Bafika emzini wami, u-O'Sullivan ehambisana nabaphenyi ababili ababeqashwe yi-IPID, beholwa nguyena.

"Ngesikhathi bengena, u-O'Sullivan, nguyena owazethula njengesisebenzi se-IPID, eqamba amanga," kusho uPhahlane enanela ngokuthi wabavulela icala bonke abathintekayo ngaleli tulo, kodwa kalikaze lisukunyelwe.

"Ngikhuluma nawe nje, uNkabinde ushilo ethula ubufakazi ukuthi idokodo liduvile ophikweni lwabashushisi.
Kuze kube yimanje, akukho okwake kwenzeka ngalo," kusho uPhahlane. 

Uthi uyajabula ukuthi uNkabinde ugcine ephumelile obala ngemihlangano yabo ayeyingxenye yayo.

UPhahlane utshele leli phephandaba ukuthi uyakuthokozela akubonayo kumabonakude ngeKhomishini kaMadlanga, kanjalo nakwi-Ad Hoc Committee.

"Ngiyazibukela futhi kuyangithokozisa engikubonayo," esho.

Uncome uJenene uNhlanhla Mkhwanazi ngokuba nesibindi sokusingatha isigcawu sabezindaba, akwazi ukudalula lezi zimfihlo eziqhubeka ngaphakathi emaphoyiseni.

"Uma kukhulunywa ngokugwanyandwa kwamandla ombuso, yikhona lokhu obekwenzeka emaphoyiseni," kusho uPhahlane.

Uphinde waveza ukuthi usezenzile izethulo zokuvela kwiKhomishi kaMadlanga lapho ezodalula naye akwaziyo, futhi anobufakazi babo obekwenzeka.

Uthe nakuba engenalo ulwazi ngohlelo lwe-Ad Hoc, kodwa uma ebizwa nakuyona, uzimisele ngokuvela khona.