LABA ngabanye bosaziwayo ababesemcimbini weHollywood Durban July, ngonyaka odlule.

Sebeqalile ukuhlungwa abazokhangisa ngengqephu kwiHDJ

Lucky Cain

SELIDUMELA emasumpeni ngokuhlungwa kwabasiki benqephu abasakhula, abazothola ithuba eliyingqa-yizivele lokukhangisa ngemisiko yabo emcimbini omkhulu waminyaka yonke, weHollywood Durban July, ozobanjelwa eGreyville Racecourse ngomhla ka-5 kuJuly.

NgoLwesithathu abeHollywoodbets Durban July Young Designers Awards, bahlunge abasiki bengqe-phu abaqhamuka ezikhungweni ezahlukene zemfundo abangaphezulu kuka-130, ngenhloso yokuthola abawu-25 abazodlulela esigabeni esilandelayo sokukhangisa ngengqephu yabo.

Kulo mcimbi wekhethelo obungoLwesithathu, amajaji okubalwa kuwona uNonhlanhla Khumalo weDurban Fashion Fair, uVuyisile Ngobese weHollywoodbets Foundation, nabanye abasiki bengqephu asebemnkantshubomvu, okubalwa kubo uZama Mathe, uKathrin Kidger noSandile Duke Mngadi, bathwale kanzima ukuhlunga kulaba basiki bengqephu njengoba bonke bekhiphe unyawo.

Nakuba kunjalo, agcine ekwazile ukuqoka abawu-25 abadlulele esigabeni esilandelayo esizoba semcimbini weHollywoodbets Gold Challenge ozoba ngoMgqibelo mhla ka-7 kuJune, eGreyville Racecourse, eThekwini.

Uhlu lwabasiki bengqephu abazokhangisa ngoMgqibelo 

Irene Price (Esayidi Fashion school)
Mary-Jane Mchunu (SG International), Fatu Shabane (Inscape Education), Thulethu Gezemdala (Fezile Fashion Academy), Mpilo Sithole (DUT), Vumani Mkhize (DUT), Andiswa Gumede (DUT), Tshepang Lebenya (DUT), Nothile Mkhungo (Esaydi Fashion School), Vuyiseka Myoni (Esaydi Fashion School), Zama Mbambo (PMB school of fashion)
Wamukelwe Nyandeni (Esaydi Fashion School), Queenton Mjweni (DUT), Samkelo Mkhize (Umgungundlovu TVET), Olwethu Ngcobo (Umgungundlovu TVET), Nohlahla Dube (Umgungundlovu TVET), Khumulani Ndlovu (Umgungundlovu TVET), Neliswa Gcwabaza (Umgungundlovu TVET), Mangoba Mnguni (Iqoda Incubator), Kheta Thango (Iqoda Incubator), S'nekamva Xali (Umgungundlovu TVET), Sthokozile Mngadi (Umgungundlovu TVET), Andile Cele (Umgungundlovu TVET), Sethu Sicwebu (Lindiwe Khuzwayo), Samkelo Makhubalo (Umgungundlovu TVET)

Kulolu hlu kuzobe sekukhethwa abayishumi abazodlulela esigabeni sokukhangisa emcimbini omkhulu weHollywoodbets Durban July, ozoba ngomhla ka-5 kuJuly, eGreyville Racecourse.

UTiffany Prior ongumqondisi wemfashini kwiHollywoodbets Durban July, uthe kuyathokozisa ukubona lolu hlelo luqhubeka nokukhula, njengoba isibalo sabasiki bengqephu nezikhungo siqhubeka nokukhula.

Uthe ngosuku lweHollywoodbets Durban July, kuzoqokwa abathathu abazobe bedle umhlanganiso kubasiki bengqephu abasafufusa, njengoba bethola imiklomelo eyahlukene, ehambisana nemifundaze nemititilizo eyahlukene kwezemfashini nesamba semali.

Kulo nyaka iHollywodbets Foundation, ibeke eceleni u-R150 000 wokuklomelisa abathathu abazophuma phambili.