Uzohlonishwa yi-IFP ngomngcwabo okamaskandi

NguDumisile "KaManana" Mthalane, weMithente ozofihlwa ngeSonto.

Mthobisi Sithole

UZOHLONISHWA ngomngcwabo okhethekile umculi kamaskandi ngenxa yokuthembeka kwakhe eqenjini lezombusazwe.

Ngokuthola kweLANGA Lempelasonto, uDumisile "KaManana" Mthalane weqembu likamaskandi iMithente, umngcwabo wakhe uzothwalwa yiqembu Inkatha Freedom Party (IFP).

Ilungu lomndeni uHlanganani Mthalane naye oyilungu leqembu leMithente, utshele leli phephandaba ukuthi ubuholi beqembu sebuxhumanile nomndeni, baqinisekisa ukuthi umngcwabo uzokwenziwa yi-IFP.

Uthi zonke izinhlelo zizokwenziwa Amathole Funerals. Uthi abangcwabi baxhumanile nabo emndenini, basho ukuthi izikhulu ze-IFP sezibajubile ukuthi abenze konke ukuze afihlwe ngesizotha uDumisile.

Uveze ukuthi lukhona nohlelo lokuhlonishwa kukanina ngokobuciko. Phakathi kwabaculi abazoba yingxenye yokuhlonipha amagalelo kaDumisile, kubalwa iqembu Izingane Zoma, u-Ali Mgube, noThokozani Langa.

Umngcwabo uzokuba ngeSonto endaweni yakwaDinda, eMakhabeleni, eKranskop.

UHlanganani uthi balindele izinhlaka eziningi zomculo, okubalwa abahleli bemicimbi yomculo nemincintiswano.

"Baningi abantu abebebambe iqhaza emculweni waleli qembu nabo okufanele babhonge emswanini," kusho yena.

Umholi welinye lamaqembu amakhulu abesifazane uThandoluni Phungula weZingane Zoma, uthi bashaqekile ngalesi sigameko. Uthi ukuzwana kwabo bekujule kakhulu nomholi weMithente.

"Besizwana kakhulu, ayikaze yabakhona ingxabano phakathi kwamaqembu ebesisebenza kuwona. Silimele endimeni, ikakhulukazi kwabesifazane ngoba siyashoda kakhulu uma kuqhathaniswa nabesilisa endimeni," kusho uThandoluni.