Kuphazamise izinhlelo ukuxineka kukaLwah Ndlunkulu

Kuthiwa useke wazanyelwa nosizo lwesintu ngenxa yesimo esingagculisi...

Kuthiwa angase angabonakali emicimbini kaDisemba...

Lucky Cain

ZIYAQHUBEKA nokuphazamiseka izinhlelo zeqembu ebelisanda kwethulwa, elihlanganisa izintandokazi zabaculi uLwah Ndlunkulu noMawhoo, elibizwa ngokuthi Zulu Queens, kulandela ukuqhubeka nokuba kubi kwesimo sempilo kaLwah, okuvela ukuthi usalashwa.

Ngokuthola kweLANGA Lempelasonto, lo mculi ubhekene nokugula osekumenze wangakwazi nokuba yingxenye yezinhlelo zeqembu iZulu Queens, ebelisanda kwethulwa, elinengoma nomculi kamaskandi uFeza esihloko sithi, Distance.

Umthombo osondelene naleli phephandaba uveze ukuthi iyaqhubeka imizamo yokutholela lo mculi usizo lwempilo.

ULwah ungaphansi kwenkampani Inkabi Records, egabe ngabaculi okukhona kubo uBig Zulu, uXowla Stallion noSiya Nene.

Inkabi Records ikuqinisekisile ukugula kukaLwah ngokukhipha isitatimende esishoyo ukuthi usazoke anyamalale kancane ngenxa yokuthi akaphilile.

Ethintwa uBig Zulu ongumpathi we-Inkabi Records, ucele ukuba kuthintwe uLeroy Khoza okunguyena ophethe imisebenzi yabaculi abangaphansi kwale nkampani. Imizamo yokuthola uLeroy iphunzile, ucingo lwakhe beluvaliwe.