ZIZOQALA ukuholwa ngaphambi kokuphela kwenyanga ephezulu izibonelelo zikahulumeni.

Lokhu kulandela ukuthi uhlaka olwengamele ukuholwa kwezibonelelo, iSouth African Social Security Agency (Sassa), lubuyekeze izinsuku zokuhola, njengoba kuza ukhetho lohulumeni basekhaya.

Umhla ka-4 wusuku lokuvota, olwaluhlonzwe yiSassa njengolunye losuku okuzoholwa ngalo izibonelelo.

Ukumenyezelwa kwalo njengosuku lokuvota, kuphoqe ukuba iSassa ibuyekeze izinsuku zayo. Ithi ukuholwa kwezibonelelo kuzoqalwa ngoLwesihlanu mhla ka-30 ku-October.

INHLANGANO eyengamele ukhetho kuleli, i-Electoral Commission (IEC), ithi isinqumo seNkantolo yoMthethosisekelo yaseNingizimu Afrika, sizophoqa ukuthi loluhlaka lulahle amaphepha okuvota angaphezu kuka-52 million abesebewagayile.

Lokhu kulandela ukuthi i-IEC ifake ohlwini lwabagaqele ezobukhansela amalungu e-ANC awu-181, okwathunyelwa amagama awo sekwedlule isikhathi sokufakwa kwawo kwa-IEC.

Isekela lesikhulu esiphezulu sezokhetho kwa-IEC, uMnu Mashego Sheburi, lithi kuzophoqa ukuthi le nhlangano ilahle umsebenzi wayo omkhulu, njengoba bese igaye u66% wamaphepha awu-79 million okuvota.

I-ESKOM ikhuza amavolontiya amaqembu ezombusazwe, asebenzisa izigxobo zikagesi nenye ingqalasizinda kagesi ukufaka izinqwebe zamaqembu awo.

Lokhu kushiwo yi-Eskom, njengoba iqhubeka imikhankaso yamaqembu yokhetho lohulumeni basekhaya oluzoba ngenyanga ezayo.

Okhulumela i-Eskom, uDaphne Mokwena, uthi ukusebenzisa ingqalasizinda kagesi uma kukhankaswa, kuyingozi enkulu.

Uthi i-Eskom iyakuqaphela ukuthi ziyanda izingqwembe ezibekwa kwingqalasizinda yayo.

Ithi isinyathelo  esilandelayo  engasithatha ukunqanda lokhu, wukususa ezinye zezingqwembe ezisezigxotsheni.

Uthi lokhu kungenxa yokuthi ngesinye isikhathi izingqwembe ezifakwayo zigcina zicekela phansi ingqalasizinda yabo.

I-ANC iyazihlangula kwelokuthi amasonto aseNingizimu Afrika abe ngaphansi komthetho ukuze ezokhokha intela.

Lokhu kulandela ukuthi amanye amasonto ezwakalise ukungenami ngalesi siphakamiso, esiphakanyiswe yi-Commission for the Promotion and Protection of the Rights of Cultural, Religious and Linguistic Rights.

I-CRL Rights Commission, yaphakamisa lokhu ngoba ithi ikholwa wukuthi amasonto azolawuleka, kunciphe nezigameko zobugebengu nokuhlukunyezwa okuthiwa kwenziwa emasontweni.

Abanye bebesola i-ANC ngokuba nesandla kulokhu. Okhulumela i-ANC, uMahlengi Bhengu, uthi iqembu kalikaze likuphakamise lokhu.

Uthi bona bakholwa wukuthi amasonto kumele akhululeke, abe nemithetho yawo, ehambisana nomthethosisekelo wezwe.