Ezifingqiwe

UKHOLELWA ekutheni lusingathwa ngesinxele udaba lwakhe, uChidimma Adetshina (osesithombeni esingenhla),  osaqhubeka nokugcizelela ukuthi wazalelwa eNingizimu Afrika, ngakho kumele emukelwe ngokusemthethweni kuleli.

UChidimma uvele ngoLwesithathu eNkantolo yesiFunda yaseCape Town, lapho efuna ukuthi le nkantolo imgunyaze ukuze abe ngowaseNingizimu Afrika ngokugcwele.

Inkantolo iludlulisele eNkantolo eNkulu lolu daba, le ntokazi iyoze ivele kuyona ngonyaka ozayo.

Ngokombiko woMnyango wezaseKhaya, uChidimma ozalwa ngabazali abangebona abaseNingizimu Afrika, wathola isitifiketi sokuzalelwa kuleli ngokungemthetho.

Udaba lwakhe lwagqama engenele uMiss SA, okwagcina kuphoqa ukuba ahoxe ngenxa yemvunge eyasuka. Uke wabonakala emele iNigeria emcimbini kaMiss Universe.

I-DA ifuna uNgqongqoshe wezobuLungiswa nokuThuthukiswa koMthethosisekelo, uNkz Mmamaloko Kubayi, aqoke ibamba lophiko lwe-Investigating Directorate Against Corruption (IDAC) ngokushesha.

Lesi sikhala savuleka kusula isigubhukane obeyinhloko yalolu phiko, uNkk Andrea Johnson. Kusukela esulile ngenyanga edlule, lesi sikhala sisavulekile.

Ilungu lePhalamende elimele iDA, uNkk Glynnis Breytenbach, lithe kusukela ngomhla ka-30 kuJuly, ungqongqoshe ubelokhu ethembisa ukuqoka ibamba kulesi sikhundla.

Lithe bayakuqonda ukuthi ukuqokwa kwenhloko yalolu phiko kulele kumengameli wezwe, kodwa okwebamba kulele kungqongqoshe.

Lithe kuyishwa ukuthi uphiko olumqoka kanje, luqhubeke lusebenze isikhathi eside ngaphandle kwebamba, noma lenhloko.

ISIPHINDE yahlala obala eyokuqumba kwekhabhinethi yaseNingizimu Afrika, emuva  kokuthi inkakha ye-ANC, uMnu Matthews Phosa (osesithombeni esingenhla), iphumele obala ngokuthi kasikho isidingo sokuthi leli zwe libe nesibalo esiphezulu kangaka songqongqoshe namaphini abo.

INingizimu Afrika igabe ngongqongqoshe namaphini abo, abawu-70.
UPhosa uthe kasikho isidingo sokuthi kuze kube namaphini ongqongqoshe.

"Kumele kuliwe nenkohlakalo, ngakho isibalo esiphezulu songqongqoshe namaphini abo, kwenza kusindele kakhulu kubakhokhi bentela," kusho uPhosa, oke waba ngundunankulu waseMpumalanga.

Phambilini i-ActionSA, yakhipha umbiko oveza ukuthi ongqongqoshe namaphini
abo, basebenzisa imali yabakhokhi bentela elinganiselwa ku-R3 billion, ngonyaka.

AMAPHOYISA aseGauteng, anxusa umphakathi ukulekelela ngokuthungathwa kukaNkz Hlengiwe Goodness Buthelezi, okuthiwa uyathinteka ekubulaweni kukaWarwick "DJ Warras" Stock.

UWarras wadutshulwa wabulawa ngoDecember nyakenye. Ngokwemibiko, uHlengiwe ubhekene namacala okuzama ukubulala uDJ Warras.

Kuleli cala u-Armando Joaquim Pacula waseMozambique, usesiqalile isigwebo sakhe seminyaka ewu-25, emuva kokuvuma icala lokubulala.

Umsolwa wesibili uVictor Majola, obevele ngoLwesithathu enkantolo, icala lakhe lihlehliselwe umhla ka-18 kuSeptember kophezulu, ukuyoqala amalungiselelo okuqulwa kwalo.

Amaphoyisa anxusa umphakathi ukuba usize ngokuthi kutholakale uHlengiwe, naye okuthiwa waba yingxenye kulesi sigameko.