KULINDELEKE ukuba zitheleke kwelakuleli ngoLwesibili izelamani zakwaNdimande, uSiyabonga noMelusi, ebezibhace eSwazini, eziyanyaniswa necala lokubulala isihlabani se-hip hop, uKiernan "AKA" Forbes (osesithombeni), owadutshulwa wafa ngo-2023.

Lokhu kuvezwe nguNgqongqoshe wezo-Bulungiswa nokuThuthukiswa koMthetho-sisekelo, uNkz Mmamoloko Kubayi, noMkhuzi wamaPhoyisa kuzwelonke, uJenene Fannie Masemola.

Lezi ziphathimandla zithi sezifike esivume-lwaneni nabaseSwazini ukuthi lezi zelamani sezingabuyiselwa kuleli, emuva kokulaxaza kwazo isicelo sokuphonsela inselelo isinqumo seNkantolo yeMantshi yaseManzini, sokuba zibuyiselwe kuleli, zizoshushiswa ngonyaka odlule.

UNkz Kubayi uthi izelamani zizobhekana namacala okubalwa kuwo elokubulala, ukwakha itulo lokubulala, nokutholakala nezibhamu nezinhlamvu okungekho emthethweni.

UMasemola uthi konke sekumi ngomumo ngohlelo lokuhlangabeza lezi zelamani uma sezilethwa ngabaseSwazini.

Ubonge ukusebenza ngokuzikhandla kwamaphoyisa akuleliya lizwe, okuyiwo ababopha kuqala abasolwa. Lezi zelamani zizojoyina abanye abasolwa abahlanu abayanyaniswa naleli cala.

UBETHWELE kanzima uMengameli uCyril Ramaphosa (osesithombeni esingenhla) njengoba ebephekwe ngemibuzo ngamalungu ePhalamende ngoLwesine, ntambama.

Phakathi kwemibuzo abejikijelwa ngayo umengameli, yindlela aqoka ngayo abantu abasezikhungweni zomphakathi, abaqokwa wuhulumeni.

Umengameli uthe njengoba kwenzeka kuMshushisi kaZwelonke, uNkk Shamila Batoi, abaneziqu ezifanele nesipiliyoni esanele, kuzofanele bafake izicelo, kube nenhlolokhono evulelekile.

Uphikise uMnu Mmusi Masimane, naye oyilungu lePhalamende obebuza ukuthi kungani i-ANC ibeka abantu abakhuliswe yiyo emandleni.

KUSUKE umsindo ngokuthunyelwa kwamaphoyisa ukuyobhekana nezinkinga enkampanini iRichards Bay Mineral (RBM), esogwini olusenyakatho yeKwaZulu-Natal.

UMengameli uCyril Ramaphosa, uthe izinkinga zezisebenzi nabaqashi eRBM, akacabangi ukuthi bezidinga ukungenelelwa ngabaphathi bezwe.

Uphikile ukuthi uke wathumela uphiko lwamaphoyisa ukuyoxazulula izinkinga zaseRBM.

Uthe usesebenze nenkampani iRBM kusukela ngo-1982, eqala ukuba ngummeli wezisebenzi zasezimayini. Uthe kakukaze kwenzeke ukuthi izinkinga zenkampani ethile zidinge ukuxazululwa ngumengameli wezwe.

OWAYEYISIKHULU senkampani iBosasa, uMnu Angelo Agrizzi (osesithombeni), uvume amacala okukhwabanisa nokushu-shumbisa imali. Ugwetshwe iminyaka eyishumi, walengiselwa eyisihlanu yale minyaka.

Ugcine evumelana nombuso ngenxa yesimo sempilo yakhe. Kuvele ukuthi kayikho iminyaka azoyibhadla ejele ngenxa yalesi sivumelwano. Udaba luka-Agrizzi luphothulwe eNkantolo ePhakeme yasePretoria.